Қазақстанда телеарналардағы сыра мен шарап жарнамасына рұқсат берілмек - на weekend.bugin.kz
Bugin.kz - на weekend.bugin.kz Bugin.kz

Сыра мен шарап жарнамасы

Қазақстанда сыра мен шарап жарнамасына рұқсат берілмек. Бұл туралы бүгін ҚР Ақпарат және қоғамдық даму министрлігі БАҚ саласындағы мемлекеттік саясат департаментінің директоры Бақнияз Қарашина айтты.

«Заң жобасы аясында 5 негізгі норманы енгізу көзделіп отыр. Бірінші – отандық баспасөз, БАҚ үшін салықтық жеңілдіктер. Екінші – мемлекеттік ақпараттық саясаттың бірыңғай жүйесін құру. Үшінші – отандық БАҚ-та сыра мен шараптың сауда белгісіне немесе атауына жарнама жасауға тыйым салуды алып тастау. Төртінші - мемлекеттің қатысы бар телерадиоарналар үшін хабар тарату тілін анықтауда өкілетті органның құзіретін бекіту. Соңғысы – ақпаратқа қолжетімділік туралы заңнаманы жетілдіру», - деп ол Ақпарат және қоғамдық даму саласындағы қоғамдық кеңестің отырысында сөзін аяқтады.

Оның атап өтуінше, газет пен журналдар үшін 2021 жылдан бастап 10 жыл мерзімге нөлдік мөлшерлемемен қосылған құн салығын енгізу көзделеді. Мұндай жеңілдік басылымның міндетті түрде онлайн-нұсқасы болған кезде ғана ұсынылады.

«Сонымен қатар заң жобасында Қазақстан аумағында шығарылған сыра мен шараптың тауарлық белгісі мен атауына жарнама жасауға тыйым салуды алып тастау ұсынылады. Бұл Интернет желісі мен шетелдік кабельдік телеарналарды мұндай жарнаманың орналастыруымен, ал қазақстандық БАҚ бұл кірісі көзінен айрылып отырғанымен байланысты. Бұл сусындардың жарнамасы газеттердің бірінші және соңғы беттеріне, журналдардың мұқабасына жарияланбауы тиіс. Телеарналар үшін мұндай жарнама сағат 22-00-ден 06-00-ге дейін ғана рұқсат етіледі», - деді Бақнияз Қарашина.

Департамент басшысының айтуынша, мұндай жарнамалардың алкоголь өнімдерін шамадан тыс ішудің зияны туралы міндетті ескертуі болады. Сонымен қатар сыра мен шарап жарнамасынан кейін іле-шала салауаты өмір салтын насихаттаған роликтер көрсетіледі.

inform.kz


0 Пікір Кіру